سندريلا آخر صيحة

[رويدا]

وحشتونى ورجعالكم بحدوتة قصتها قديمة شوية لكن مكتوبة بلغتنا العصرية
  وبتبدأ حكايتنا  ببنت  كان اسمها سندريلا
 
سندريلا كانت بنت أمورة جدا وجميلة جدا

وكمان كانت يتيمة وعشان مكنتش عارفة عنوان دار أيتام رسالة اضطرت تعيش مع مرات أبوها الشريرة وبناتها المفتريين وكانوا بيعملوها على إنها الخدامة بتاعتهم كانت بتطبخ لهم وتغسل لهم وتكنس لهم وتسيأ السلم......وبرضه مكنتش عاجبة

الرز معجن...يا بت الفستان لسه مبقع .....ياللى تتشكى فى حبة عينك الأرضيات لسه ما بتلمعش......وسندريلا مستحملة واهى عيشة والسلام 

لحد ما جه يوم نزل اعلان فى الجمهورية...ان فى أمير من دول البترول عاوز يتجوز بس محتار يختار انهى بنت...عشان كده باباه ومامته عملوا حفلة كبيرة وعزموا فيها كل بنات المدينة...وكل بت قعدت تفكر حتروح الحفلة لابسة أيه.....؟؟؟؟

يا ترى الفستان أبو ترتر ولا البنطلون أبو شخاليل وفى وسط الهيصة دى كانت سندريلا قاعدة تعيط عشان معندهاش هدوم زى هدوم ولاد مرات أبوها اللى جيباها لهم من الشواربى

وفى عز العياط والنكد...بصت سندريلا لقت قدامها فى البدروم بت رووووشه جدااا...قامت خافت جدا وسألتها انتى مين....؟؟؟

قالت لها أنا العفريتة المختصة بالموضه وجايه لك أساعدك عشان تحضرى الحفلة وانتى على أحدث موضة

استغربت سندريلا وقالت لها ازاى ما انتى شايفه اللى انا فيه  يا ختى

فقالت لها العفريته بسيطه الموضه الأيام دى الهدوم الديرتى والشعر الكنيش وف ثوانى كانت سندريلا مقطعه الجلابيه وناكشه شعرها ....طب والجزمه....قالت لها العفريته جزمة أيه.....؟؟؟

قمة الشياكة هو الشبشب أبو صابع بتاع زماااااااااااااااااااااااااااااان

سندريلا كان عارفة إن الحفلة فى فندق فور سيزون فقالت للعفريته
هاروح الفندق أزاى هاتيجى توصلينى؟؟؟قالت لها لاء طبعا
انتى هتركبى أى ميكروباص نازل التحرير ومن هناك تتشعبطى فى ميكروباص حلوان وتنزلى قدام الفندق...ولو بتوع أمن الدولة سألوكى رايحة فين يا شاطرة أو حاولوا يمنعوكى من الدخول عللى صوتك وشرشحى وقوليلهم انتو عارفين بتكلموا مين ؟؟ والله لأكلملكم أونكل فوزى هايوديكم فى داهية وساعتها هيدخلوكى على طول
 

وراحت سندريلا الحفله وقابلت الأمير اللى أعجب بيها جدا وجه وقف قدامها وقال لها بمنتهى الرقه ....بصراحه انا ماليش فى شغل ...السنجفة ...والمسمرة ...والتثبيت
لكن .....ممكن تبقى البت بتاعتى...................؟؟
سندريلا وافقت على طول وقعدت ترقص وتهرتل مع الأمير ومن فرحتها نسيت ان العفريته اتفقت معاها انها هتيجى الساعه 12 بالظبط...لو لقيتها لسه موجوده هتفضحها.....وتسيح لها فى وسط المعازيم....


وفجأة دقت الساعة اتناشر...




وبصيت سندريلا لقت العفريته داخله عليها.....خافت وجريت على بره ومن لبختها وقعت منها فردة الشبشب ابو صباع...واضطرت تروح البيت بفردة شبشب واحدة....لكن الأمير كان حبها وقرر يدور عليها ويلاقيها ومكنش عنده اى حاجه توصله ليها غير فردة الشبشب....

وكان الموضوع سهل للغاية لأن عدد البنات اللى مقاس رجلهم 45 فى البلد قليلين جدااااا  وبسرعة لقى الأمير سندريلا....
وعلى طول....ضرب معاها ورقة جواز عرفى.........وسافر معاها على شرم.....وعاشوا فى تبات ونبات لمدة شهرين ونص..............وبعدين طلقها
والطبيعى بردو انه طلقها عرفى ...زى ما اتجوزها عرفى
يعنى من الاخرسندريلا انضحك عليها
وتوتة توتة فرغت الحدوتة...

ها قولولى ايه رأيكم فى سندريلا بتاعة الأيام دى ؟؟؟؟؟

 

[ماما هادية]

عجبتني جدا

واقعية بشكل

[elnawawi]

رائعة .. وللأسف واقعية كما قالت ماما هادية

[سلمى أمين]

ايه يا جدعاااااااان..ماهو نفس موضوع (بالعربي سندريلا )

[elnawawi]

طيب وإيه يعني ؟

[سيفتاب]

ايه رويدا المواهب دي 

فطستيني من الضحك وفعلا واقعية للأسف

لا يا زبادي مش زي بالعربي سندريللا لأنه فيلم بيأكد أن القصة دي جميلة وحلوة ومفيهاش اي حاجة

هنا رويدا بتنقل الواقع ونتائجه المريره بأسلوب كوميدي رائع

[رويدا]

أشكركم يا جماعة على مروركم 

وعايزة أقول حاجة للأخت زبادى قصة سندريلا كلنا عارفينها وحافظينها مش الغرض من الموضوع سرد الحكاية ولكن الفكرة إنى أقول لسندريلا اللى انضحك عليها أو أى بنت ممكن تكون مكانها اوعى تفتكرى إن الجمال هو جمال الظاهر وعمر الجواز العرفى ما هيكون الحل لمشاكلك الحياتية
يا سندريلا ..انتى أكرم بكتير من الزواج بهذه الطريقة...آخرتها عرفى يا سندريلا
يا بنات إحنا أكرم من أن نكون سندريلا


وانت ياض يا أمير ياللى جاى تتجوز سندريلا....لو انت بتحبها فعلا بلاش العرفى
ياض اتقى الله وافتكر ان انت عندك اخوات سندريلات فى البيت وكما تدين تدان


وأخيرا هاقول لكل أمير وسندريلا
يقول الحبيبب المصطفى صلى الله عليه وسلم :يا معشر الشباب من استطاع منكم الباءة فليتزوج،فإنه أغض للبصر وأحصن للفرج ومن لم يستطع فعليه بالصوم

وعنه قال: النظرة سهم من سهام إبليس من تركها خوفا من الله آتاه الله إيمانا يجد حلاوته فى قلبه

[رويدا]

أى خدعة يا سيفتاب تعيشى وتضحكى يا حبيبة

[أحمـد]

بسم الله



هل يمكن أن أقول رأيي بصراحة؟

[رويدا]

طبعا ممكن يا أحمد

فأهلا بحرية الرأى ،و أهلا بالصراحة

فأنا أعشقهما كثيرا

[هيما]

طبعا ممكن يا أحمد

فأهلا بحرية الرأى ،و أهلا بالصراحة

فأنا أعشقهما كثيرا

جنت على نفسها براقش

 

[أحمـد]

بسم الله

طبعا ممكن يا أحمد

فأهلا بحرية الرأى ،و أهلا بالصراحة

فأنا أعشقهما كثيرا

طيب الحمد لله


الصراحة الكلمات مبتذلة جدا

وبالكاد يمكن قبولها من شباب يمزحون فيما بينهم

أما أن تكتب وتنشر فـ صعب شوية 

والمعنى للأسف لا أراه يعبر إلا عن واقع مرفوض عن أكثر الناس ولا يمثل إلا نسبة ضئيلة جدا.

إلا أن نكون ممن يصدق أن الأفلام تحكي الواقع فعلا لا أنها تزيف الواقع لنشر ما يريدون.

وليس في القصة أي جديد، فقصة سندريلا قديمة ومحفوظة وليست هذه سوى مسخ لها

بخلاف مثلا خواطر الأخت زبادي، فرغم اعتراضي الشديد على كلماتها، إلا أنها قدمت حكاية جديدة، بأسلوب سرد قصصي جيد شهد الجميع أنه يحاكي أحمد خالد توفيق الكاتب المشهور


طبعا، أنا لا أقارن بينكما، إنما ذكرت خواطرها لأفرق بين ابتكار الحكاية وبين مسخ حكاية قديمة.

مع اعتراضي على الإسفاف في العامية، وابتذال الحديث لهذا المستوى الذي قد لا يليق بالحديث الشفوي فضلا عن القصص المكتوبة

أشكرك على قراءة رأيي
وأعتذر عما به من جفاء

 [/size]

[الكتكوت الفصيح]

حلوه         المشكله انه ورا الكلام المضحك اللى فيها ده مستخبى واقع مريييييييير مش عارفه زى ما بيقولوا" هم يضحك وهم يبكى "    ده كان شعورى وانا بقراها

[ماما هادية]

كلامك كالعادة جارح جدا وقاسي يا أخ أحمد

ولو كلمك الانسان بربع ما فيه من قسوة لملأت لنا المنتدى خواطر باكية وشذرات شاكية

أصلا اسلوب المقارنة بين عضوين في المنتدى أسلوب فج جدا

وسلمى بالغ الأعضاء في إبداء الاعجاب بخواطرها مراعاة لصغر سنها ولتشجيعها ... ليس إلا ...
على الأقل هذه القصة لها هدف ومضمون

لا تبالي يا رويدا بما قاله الأخ أحمد... فهو هكذا دوما.... قصتك فيها هدف جيد، والأسلوب عامي فقط... ولا ابتذال فيه ...

ويسعدني أن أرى المزيد من مشاركاتك

[هيما]

كلامك كالعادة جارح جدا وقاسي يا أخ أحمد

ولو كلمك الانسان بربع ما فيه من قسوة لملأت لنا المنتدى خواطر باكية وشذرات شاكية

أصلا اسلوب المقارنة بين عضوين في المنتدى أسلوب فج جدا

وسلمى بالغ الأعضاء في إبداء الاعجاب بخواطرها مراعاة لصغر سنها ولتشجيعها ... ليس إلا ...
على الأقل هذه القصة لها هدف ومضمون

لا تبالي يا رويدا بما قاله الأخ أحمد... فهو هكذا دوما.... قصتك فيها هدف جيد، والأسلوب عامي فقط... ولا ابتذال فيه ...

ويسعدني أن أرى المزيد من مشاركاتك

الله يرحمك يا جواد

 

[رويدا]

أشكركم جميعا أيها الأعضاء على فهمكم قصدى من الحكاية
أما بالنسبة للأخ أحمد وأقول له فى نقاط سريعة:

 أولا :أنا كتبت الحكاية بهذا الأسلوب وهذه اللغة عمدا وهى ليست أكثر من إعادة صياغة لقصة قديمة بأسلوب مضحك ولغة سهلة
وأردت أن أضفى عليها شيئا من روح الفكاهة التى تحوى فى طياتها سخرية من واقعنا الأليم

ثانيا: هذا الواقع الذى تراه مرفوضا فإنه مايحدث للآسف المؤسف وبالفعل أنا شاهدت بعينى نماذج كثيرة لهذه السندريلا وإذا كانت اللغة المتداولة هنا فى المنتدى هى الفصيحة فسأكون أول من يتحدث بها ولكنى فضلت هذه اللغة لأنها أقرب لهؤلاء الشباب وستجذبهم إلى قرائتها كاملة حتى نقضى على هذه النسبة الضئيلة وكأنى جمعت بين أسلوب الحكاية الشائق واللغة المتداولة السهلة


ثالثا: قولك إن القصة ليس بها أى جديد وقديمة أناقد أوضحت ذلك سلفا وصرحت فى بداية كلامى بأنها قديمة ومستوحاة من قصة سندريلا المعروفة بل والمحفوظة أما الجديد بها فكلها جديد فالرسالة التى أحاول أن أرسلها أظن أنها لم تكن موجودة فى قصة سندريلا القديمة وقد أجملتها بعد القصة فى توجهيات موجهة للأخت سندريلا


رابعا: خواطر زبادى أنا لم أقرأها بعد وأدعو لها بالتوفيق فهى تكتب بلون معين وأنا بلون آخر وليس من الإنصاف  وضعهما على كفتى الميزان وننتظر أن ترجح إحداهما

وفى النهاية -بالرغم من احتجاجى السابق-أشكرك يا سيد أحمد على رأيك الذى احترمه كثيرا لكنها -عفوا وجهات نظر-وأتمنى من الله أن أكون  قد وفقت فى إيضاح مافى داخلى

[elnawawi]

جئت متأخرا والأخت رويدا وماما هادية ردوا عليك لذا فسأكتفي بما قيل ولن أضرم نارا أكثر في الحطب ..

[هيما]

يا هيما وأحترم رأيك كثيرا 
ولقد أوضحت رأيى سلفا وأسعد برؤية المزيد من مشاركاتك

تم الحذف.

[رويدا]

يا هيما وأحترم رأيك كثيرا 
ولقد أوضحت رأيى سلفا وأسعد برؤية المزيد من مشاركاتك

[elnawawi]

تاني رجعنا لكتابة المشاركات ثم حذفها ؟