تعمل ايه لو كنت مكانى ؟؟؟؟؟

[doctora]

 
أولا السلام عليكم ورحمة الله وبركاته
أنا عضوة جديدة فى المنتدى و طبعا مشفتش كل المواضيع اللى فيه
بس المواضيع اللى قريتها عجبتنى جدا     
وحبيت أشاركم والموضوع اللى اختارته هو

تعمل ايه لو كنت مكانى ؟؟؟؟؟   

أنا طالبة فى كلية طب وبتقابلنى أحداث كتيرة غريبة فقلت أشركم فيها وأستفيد منكم 

و أسألكم تعملوا ايه لو كنتم مكانى فى الموقف ده      
 
أدخل لجنة امتحان العملى على حالات المفروض انى اخد التاريخ المرضى ليهم و افحصهم و اشخص الحالة واقول الحل للدكتور اللى بيمتحنى

لغاية دلوقتى حلو صح 

لأ مش صح لأنى بدخل على الحالة بتطلب منى فلوس 

لو اديتها فلوس بتقولى تاريخها المرضى و التشخيص وايه العلامات المرضية اللى واضحة عليها
وبكدة الدكتور يتبسط ويدينا درجات حلوة فى الامتحان
بس المشكلة دى تبقى رشوة ولا لأ؟ ويا ترى بالطريقة دى هنطلع دكاترة كويسين؟؟

أما لو مديتهاش فلوس مش بتقول حاجة واحيانا تتوهنا و مبنبقاش عارفين نلم الموضوع 
و بكده الدكتور بيتضايق منا و طبعا نتيجة وحشة اخر السنة 
وطبعا بتلاقونا فى حلايب وشلاتين فى التكليف 

لو مكانى تعملوا ايه خصوصا انى لسه مدخلتش الامتحان ولكن دى حكايات بنسمعها من الدفعات اللى قبلنا
 

شكرا

[elnawawi]

ممممم .. ممكن أهدد المريض إن أنا هأوصي عليه الدكاترة يعالجوه غلط ويعطوه أدوية خاطئة بناءً على المعلومات الخاطئة التي أعطاها لي ..

آه نسيت .. مرحبا بك في المنتدى ونتمنى أن تطيب لك الإقامة بيننا

[فتاة مسلمة]

مرحبا بكِ دكتورة

ونتمنى أن يطيب لكِ المقام بيننا

وأهم حاجة بعد التخرج لا تنسينا بعيادة طبية صغيرة ومحندقة للمنتدى 

طيب بالنسبة لحالتك التي ذكرتِها فأرى أنه لابد من إبلاغ المسؤولين من الدكاترة ورؤساء الأقسام والإدارة عامة كي يكون هناك حزم أكثر من ذلك ولتكون الأمور منظمة لتسهل المسير في مثل تلك الأمور

[doctora]

شكرا لك

نسيت اوضح جزئية هامة ان المرضى من كتر دخولهم الامتحانات بنفس الطريقة اصبحوا اكثر معرفة بحالتهم و بالادوية المناسبة لهم و بالادوية الغير مناسبة

كما انهم اصبحوا من اصحاب الدكاترة المقربين فى المستشفى لانهم يترددوا على المستشفى فى اوقات الامتحان من كل عام
"يعنى معرفتهم بالدكاترة و حالتهم و حتى باقسام المستشفى اكتر مننا احنا الطلبة "

[فتاة مسلمة]

 

يا عيني يا بنتي من الواضح أن الحالة مستعصية 

لي صديقة هي بامتياز الآن سأسألها لكِ وأرد عليكِ

[سيفتاب]

مرحبا بك يا دكتورة

 

للأسف هذه المعلومة أعرفها من صديقة لي قبل تخرجها

وللأسف أيضا أن النظام التعليمي كله فاشل ولا أدري كيف يفكرون في مثل هذه الكلية الحيوية وكيف يقبلون بتخريج دفعات المفترض أنها مسؤولة عن أرواح الناس بهذه الطريقة.

دعينا نفكر معك جميعا في حل لهذا الموقف.

[إيمان يحيى]

أهلا يا دكتورة .. نورت المنتدى  

ربنا يوفقك ويرزقك مريض عنده ضمير

أما لو كنت مكانك فكنت هضرب المريض دة علقة موت وأعمله عاهة مستديمة وأشخص حالته وأوصف العلاج على هذا الأساس : عاهة مستديمة والفاعل مجهول ويحتاج علاج أكثر من 6 سنين  

[فتاة مسلمة]

أما لو كنت مكانك فكنت هضرب المريض دة علقة موت وأعمله عاهة مستديمة وأشخص حالته وأوصف العلاج على هذا الأساس : عاهة مستديمة والفاعل مجهول ويحتاج علاج أكثر من 6 سنين 

 

 

[doctora]

السلام عليكم و رحمة الله وبركاته
اشكركم على مشاركتكم ليا فى فى الموضوع ده

بس يا جماعة ساعدونى الاقى حل 

عجبنى اقتراح "ماما فرح " بس ده محتاج تدريب على الكاراتيه أو الملاكمة و ممكن المريض يكون هو كمان بيتدرب 

و فى نفس الوقت عاوزة الاقى حل ليا و للى هيدخل سنة خامسة بعدى ان شاء الله لانها مشكلة موجودة من زمان فى كليات الطب
وبقى الوضع ده معترف بيه على مستوى الدكاترة والطلاب والمرضى كمان 
 

وشكرا

[إيمان يحيى]

 

الحل أحياناً ثمنه غالي ومحتاج ناس مستعدة تضحي

مش في مشكلتك بس لكن في كل المجالات التي طالها الفساد

الحل من وجهة نظري أنكم تثيروا الموضوع على نطاق دفعتكم والدفعات السابقة وتجمعوا عدد منكم يكون مستعد لمواجهة الإدارة على أي مستوى حتى وزير التعليم العالي (هو لسة فيه وزير تعليم عالي؟)

ولو قدرتم تتكلموا مع أساتذة بالكلية ( بالذات المعارف والشرفاء ) عشان تعرفوا منهم إمكانيات التغيير الحقيقي بناء على خبراتهم العملية في التعامل مع العميد وأساتذة الأقسام

وممكن اقتراح بعض الحلول مثل:

1- حضور الطبيب المسئول عن علاج الحالة أو أي طبيب آخر لمراقبة الكشف للتأكد من عدم تلاعب المريض بالطالب ولضمان صحة المعلومات التي سيعطيها المريض

2- اقتراح اختيار الحالات الحديثة والتي لم يسبق لها دخول المستشفى خلال العامين السابقين

[elnawawi]

ياااااه ده الموضوع ده من زماااااااااااااااان جدا والكل راضي ومبسوط .. من حوالي 40 سنة والحال نفس الحال .. المريض محترف أخذ فلوس .. وطبعا الدكاترة عارفين وراضيين .. والمسئولين عارفين وأكثر رضا .. والحياة حلوة بس نفهمها .. والناس تعودت وصعب عليهم قبول التغيير .. ولو تحرك واحد أو اثنين أو عشرة سيحبطهم الآلاف الأخرين ..  وليتم تغيير الموضوع فيحتاج إلى جهاد حقيقي في وجهه ... ولكن من سيقوم بهذا الدور  ؟!

[doctora]

شكرا يا "ماما فرح "
 
1
. احنا فى الامتحان بنبقى مجموعة من الطلاب على اكتر من حالة و دكتور واحد يلف علينا ويمتحنا و مينفعش انه ياخد باله منا كلنا
2
. الدكاترة احيانا بيكونوا قاصدين يبعدوا عشان يدوا فرصة للمريض انه يطلب منا فلوس " انا باخد كورس عند دكتور فى الجامعة و قالنا ابقوا ظبطوا الحالة بخمسين جنية " يعنى هما بيبقوا عارفين ان الحالات بتاخد فلوس
3
. الحالات الجديدة مبترضاش تدخل عشان نمتحن عليهم بتبقى خايفة مننا ان احنا نتعبهم و كمان الحالات اللى بتاخد الفلوس بتبقى عارفة مواعيد الامتحان وبتيجى تتحجز فى المستشفى و هى حالات الاعراض والعلامات المرضية بتبقى واضحة عليهم " زى ما بيقول الكتاب بالظبط " والدكاترة بيتبسطوا منهم

هى مشكلة موجودة ومش عارفة هاعمل ايه فى الامتحان ان شاء الله

ربنا يستر     

[doctora]

ياااااه ده الموضوع ده من زماااااااااااااااان جدا والكل راضي ومبسوط .. من حوالي 40 سنة والحال نفس الحال .. المريض محترف أخذ فلوس .. وطبعا الدكاترة عارفين وراضيين .. والمسئولين عارفين وأكثر رضا .. والحياة حلوة بس نفهمها .. والناس تعودت وصعب عليهم قبول التغيير .. ولو تحرك واحد أو اثنين أو عشرة سيحبطهم الآلاف الأخرين ..  وليتم تغيير الموضوع فيحتاج إلى جهاد حقيقي في وجهه ... ولكن من سيقوم بهذا الدور  ؟!

هى مشكلة فعلا زى كل المشكلات اللى فى البلد 

بس انا ساعات ببصلها من ناحية ان المرضى دول مرضهم مش مخليهم يشتغلوا وعندهم اكيد مسئوليات   
بس ساعات بلاقى أطفال و معاهم اهلهم بقول طب ما ده زى التسول وساعات المريض ميرضاش بالفلوس و يطلب اكتر فبحس انه جشع و تجارة بالمرض 

وكنت فكرت انى ادى فلوس بس بعد الامتحان بنية صدقة لكن المرضى مش كانوا بيقولولى حالتهم صح و يقعدوا يبصولى وانا بحل و مستنين انى ادفعلهم فلوس و ده فى امتحان اعمال سنة ب 20 درجة بس

     
مش عارفة اعمل ايه ربنا يهدينا لمل يحب ويرضى   

[أبو بكر]

بصراحة لو كنت مكانك كنت ممكن أتصرف بطريقة مختلفة أجيب مريض أعرفه و أحجز له في المستشفى و أكشف عليه    و لو نفعت الطريقة دي مش هقولها لحد علشان أنا مش هغش، لكن مين عارف زميلي اللي هقول له على الفكرة ممكن يجيب مريض مكشوف عليه قبل كده و يآخد المريض بكشفه 

حسبنا الله و نعم الوكيل حتى المرض بيستغل في معصية الله بدلاً من العودة إلى الله .

[ماما هادية]

أهلا ومرحبا بك يا دكتورة
نورت المنتدى وسعداء جدا بانضمامك لنا

بكل أسف لا أستطيع ان افيدك في مشكلتك لأني مصدومة منها للغاية

 

[doctora]

بصراحة لو كنت مكانك كنت ممكن أتصرف بطريقة مختلفة أجيب مريض أعرفه و أحجز له في المستشفى و أكشف عليه    و لو نفعت الطريقة دي مش هقولها لحد علشان أنا مش هغش، لكن مين عارف زميلي اللي هقول له على الفكرة ممكن يجيب مريض مكشوف عليه قبل كده و يآخد المريض بكشفه  

حسبنا الله و نعم الوكيل حتى المرض بيستغل في معصية الله بدلاً من العودة إلى الله .

السلام عليكم ورحمة الله وبركاته

برضه الحل ده عجبنى ويتناسب مع الموضوع 

بس 

المشكلة انه موجود ومطبق فعلا فى كليات الطب 

ازاى ؟؟

بعض زملائنا و زميلاتنا فى الكلية بيكون ليهم قرايب من الدكاترة وفى بياخدوا كورسات عند دكاترة وقريبين منهم

بس ايه الخدمة اللى ممكن الدكتور يقدمها لقريبه او طالب بياخد عنده كورس
     
انه يشوفله الحالات اللى موجودة فى المستشفى و يقوله اسم الحالة والتشخيص والعلامات الموجودة عليها
    
" وده حصل معايا شخصيا انا باخد كورس عند دكتور وكان عندنا امتحان اعمال سنة ب 100 درجة 25 منهم على الحالات ليلة الامتحان اتصلنا بيه وعرفنا الحالات المحجوزة فى المستشفى و تشخيصها وكمان كل قسم فيه مين  lطبعا اخدت الحالات زى كل اللى كانوا بيمتحنوا معايا واللى معرفوش ليلة الامتحان عرفوا الصبح قبل الامتحان

وبالطريقة دى ندخل الامتحان منحتاجش حاجة من المريض غير اسمه و هنعرف عنده ايه لاننا حافظين كل حالة عندها ايه و مش هندى للمريض فلوس   

ونبقى ضحكنا عليه  وبرضه ضحكنا على نفسنا     


بس المشكلة ممكن المريض يضحك علينا ويقول اسم المريض اللى جنبه    


لازم نخليه  يطلع البطاقة بقى     

إنا لله و إنا إليه راجعون   [/size][/size]

[doctora]

أهلا ومرحبا بك يا دكتورة
نورت المنتدى وسعداء جدا بانضمامك لنا

بكل أسف لا أستطيع ان افيدك في مشكلتك لأني مصدومة منها للغاية

 

شكرا يا ماما هادية جزاكى الله خيرا   

الحقيقة انا كمان مصدومة 

[جواد]

أهلا ومرحبا بكم أختنا الكريمة،

عسى يطيب لكم المقام في منتداكم..

المشكلة أعرفها من أصدقائي الأطباء، وللأسف دي مش المشكلة الوحيدة في أنظمتنا التعليمية ،

أعتقد ان ده طبيعي جدا لما يعانية المجتمع من نقص شديد في الدين والأخلاق ..

[elnawawi]

يا حبيبتي يا مصر يا مصر ..

[ماما هادية]

لكن هذه المشكلة بالذات كارثية بشكل يفوق التصور
لأن هذا معناه تخريج دفعات من الاطباء ليست على أهلية وكفاءة حقيقية.... وهذه الدفعات ستكون مسؤولة عن صحة الناس وعن حياتها....