إيه...هيه كيميا؟!

[ماما هادية]

طيب في طريقة أبسط من الطريقة الحارقة دي، كنت تعلمتها من زماااااااااااااااااااااااان من تختخ

تعرف تختخ؟؟

وهي غمس الفرشاة بعصير الليمون والكتابة به

ثم يقوم  الطرف الآخر بتسخين الورقة بمكواة مثلا، فيظهر المكتوب بلون واضح

وإن كنت لا اعرف ما هو شغل الكيميا هنا.. فما هو؟

[أحمد]

تختخ أخو موزة أكيد 


طيب لما بتحط بقى ليمون مركز الكيميا بتعمل ايه عشان الخط يظهر؟

[علومجى]

تختخ اخو لوزة ونوسه وعاطف ومحب..المغامرون الخمسة

فى طريقة الليمون والتسخين اللى بيحصل ان الجزء اللى فى الورقة المشبع بالحمض (الليمون يعنى ) بيتحرق ولونه يختلف عن باقى الورقة

طيب لما بتحط بقى ليمون مركز الكيميا بتعمل ايه عشان الخط يظهر؟

الليمون يتفاعل مع الصودا ويتكون مركب له لون مختلف عن لون الورقة... ومين موزة دى؟

[أحمد]

هي كانت نوسة؟! سبحان الله كنت باسمعها موزة لوزة تختخ عاطف محب.. غامر ومخمخ تابع وحب.. المغامروووووووووووون الخمسة.. في الخير يلتقون.. مش فاكر بقى

[ماما هادية]

سبحان الله على معلوماتكم الثقافية المحدودة

لوزة اسم الدلع، والاسم الحقيق فوزية، وهي أخت عاطف
ونوسة اسم الدلع، والاسم الحقيقي نفيسة، وهي أخت محب
وتختخ اسم الدلع (لأنه تخين)، والاسم الحقيقي توفيق، وهو صديقهم ومن نفس الحي.. المعادي
وأكبرهم وأشدهم ذكاء

والأصدقاء الخمسة مع بعض هم المغامرون الخمسة

مش كلهم اخوات يعني

[أحمد]

 
دي تفاصيل القصة المكتوبة.. ولم اقراها.. لكن ده اللي شفته في الكارتون

 

[ازهرية صغيرة]

السلام عليكم

جزاك الله خيرا على المعلومات
بس فى سؤال هو دة اتحاد مركب مع مركب
ولا اية
اصل انا باخد الدرس دة السنادى ولسة قرئاة امبارح
وعيزة افهمو اكتر فيريت
تفهمنى لانتى محبة للكمياء جدا

[ازهرية صغيرة]

السلام عليكم

هل من مدرس ياشرح لى الدرس

ام الكل زوغ منى عشان الشرح

هل من محب للكيمياء؟؟

[علومجى]

سبحان الله على معلوماتكم الثقافية المحدودة

حصل خير

اصلى كت بسمع الاغنية اللى فى الاول بس...

السلام عليكم

جزاك الله خيرا على المعلومات
بس فى سؤال هو دة اتحاد مركب مع مركب
ولا اية
اصل انا باخد الدرس دة السنادى ولسة قرئاة امبارح
وعيزة افهمو اكتر فيريت
تفهمنى لانتى محبة للكمياء جدا

 نأسف على  التأخير

وبالنسبه للسؤال... ممكن توضحى السؤال شوية

[علومجى]

يللا كيميا ولا كفايه كده؟

ممكن يبقى يللا فيزيا لو الكيميا مش عاجباكم

اقولكم ..
سابدا موضوع جديد باذن الله بعد الامتحانات..
ولكن لى طلب عند كل عضو
لو عندك موضوع  معين "فى الكيميا او الفيزيا" او ظاهرة فيزيائية او  تطبيق معين عايز تعرف عنه اكتبلى اسمه..
 ولو عارفه... ياريت تحضره كويس عشان تعرضه ان شاء الله فى الموضوع الجديد..شكرا
 

[ماما هادية]

مرحبا بعودتك يا علومجي

والكيميا تعجبنا جدا بالطبع ما دمت أنت الاستاذ

كيف حال امتحاناتك أنت وغريب الدار هذا الفصل؟؟

[علومجى]

يااااااااه واضح انى بقالى كتييييييييير ما جيت هنا

دايمن يا ماما هادية بتدينى بريستيجى وبترفعى معنوياتى

سابدا موضوع جديد باذن الله بعد الامتحانات..
ولكن لى طلب عند كل عضو
لو عندك موضوع  معين "فى الكيميا او الفيزيا" او ظاهرة فيزيائية او  تطبيق معين عايز تعرف عنه اكتبلى اسمه..
 ولو عارفه... ياريت تحضره كويس عشان تعرضه ان شاء الله فى الموضوع الجديد..شكرا
 

بصراحة مش فاكر ايه الموضوع اللى انا كنت ناوى اعمله ده،انا حتى تفاجأت بكلامى ده لحظيا كده

بس شكله كان هيبقى قنبله واضح انى بعرف اسوّق واعمل دعايا كويس بدليل ان مفيش حد رد 

طيب انا هكمل عادى ان شاء الله وبرضه لو ...

.... عندك موضوع  معين "فى الكيميا او الفيزيا" او ظاهرة فيزيائية او  تطبيق معين عايز تعرف عنه اكتبلى اسمه..
 ولو عارفه... ياريت تحضره كويس عشان تعرضه ان شاء الله ..شكرا
 

خلال هذا الاسبوع ساضع اول مشاركة باذن الله

[حازرلي أسماء]

 

متابعون ومنتظرون يا علومجي 

[ماما هادية]

ربنا يكرمك يا علومجي

بالانتظار

[سلمى أمين]

هو انا اللي قريته ده صح ولا انا عيني بتستعبط عليا ... 






هي سمية محبة للكيمياء جدا

انتي كنتي بتدفعي عني عين ولا ايه؟؟؟..مكنتش هحسدك ع فكرة 

[سلمى أمين]

معلش يعني مش عارفة هي عيني شغالة هبل عليا ليه كده..؟؟؟؟؟؟؟؟؟؟؟؟

هو بجد فيه امل ان حد يشرح لنا فيزياااااااااا؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

لا اله الا الله...

نجوت ورب العزة!!!!!!!!!!!!


طب ماتيلا بقي..حد يشرح لنا حاجة من منهج اول ثانوي..!!

[علومجى]

ما تقلقى

عينك شغاله كويس

احنا هنا بنتكلم عن الكيميا بشكل بعيد عن الدراسه الممنهجة،

ومع ذلك مفيش مانع اشرح لك اى فيزيا فى منهج اولى ثانوى.

اعملى موضوع اخر  وانا اشارك فيه لانى مش عارف اولى ثانوى بيدرسوا ايه .

[علومجى]

الجدول الدورى الحديث

منذ زمن بعيييييييييييييييد لم تكن هذه العناصر موجودة ...أقصد لم يكتشفها احد ، وبالتالى لم يفكر احد فى ترتيبها فى جدول . ولكن بعد ان  تطور العلم وازداد عدد العناصر بدا الكيميائيون فى ترتيب تلك العناصر فى جدول ليسهل التعامل معها . فظهر دوبرينر ونيولاندس ومندليف و موزلى والشله دى كلها ، كل واحد من هؤلاء العلماء اضاف جديدا بعد سلفه حتى اصبحت العناصر  الكيميائية فى هذا الجدول .
شكله معقّد صح...
فى هذا الجدول رتبت العناصر حسب الزياده فى العدد الذرى فى دورات افقيه ومجموعات راسية ، ونجد فى هذا الجدول ترتيبا تصاعديا او تنازليا – على حسب انت قاعد فين فى المدرج  – للخواص الفيزيائية والكيميائية  للعناصر خلال الدورات والمجموعات .
وانت قاعد امام الشاشه هتلاقى العناصر على شمالك وعلى يمينك عناصر تسمى العناصر التمثيلية ، وفى المنتصف ستجد عناصر ايضا ولكنها عناصر انتقاليه، اما الحاجت اللى تحت ....دى عناصر برضه -  اه واللهى – تسمى اللانثانيدات والاكتينيدات.
المهم عشان ما اطول عليكم ......
انا جاى النهارده اتكلم عن العناصر الكيميائية فى ثوب التطبيقات الحياتية  ، بمعنى اننا هناخد عنصر نتكلم عنه كيميائيا ونبحث عنه حولنا فى البيت فى الشارع وفى اى مكان ونرى كيف اننا نستخدم الكيمياء كل يوم .

[إيمان يحيى]

الجدول الدورى الحديث


انا جاى النهارده اتكلم عن العناصر الكيميائية فى ثوب التطبيقات الحياتية  ، بمعنى اننا هناخد عنصر نتكلم عنه كيميائيا ونبحث عنه حولنا فى البيت فى الشارع وفى اى مكان ونرى كيف اننا نستخدم الكيمياء كل يوم .

عناصر حولنا في البيت ؟

هو فيه حاجات تانية عندنا في البيت غير الدبان والناموس والعناصر الإرهابية اللي مكتوبين باسمنا في شهادة الميلاد؟   

[علومجى]

نبدا بعنصر الكربون C

هذا الاسم من كلمة لاتينية تسمى ( كربو ) ومعناها الفحم.
بالنسبة لعنصر الكربون - ومش عايز اخبى عليكم - مهم جدا جدا ..

مش يعنى عشان هو موجود فى اكثر من 3 الاف مركب  .

اقولكم ليه...

الكربون موجود فى الجو الذى نتنفسه على شكل غاز ثانى اكسيد الكربون CO2.

و الوقود الحفرى مثل الفحم والبترول والغاز الطبيعى يتكون اساسا من الكربون وشوية حاجات تانيه فوق بعض

غير كده الكربو او الكربون له مركبات خاصه بتاعته هو بس يشترك فيها مع نفسه فى تركيبها
يعنى بعمل حاجات اسمها
 allotropes
- بصراحة  لا اعرف ترجمتها الحرفيه  -
لكنها تعنى المركبات المختلفة لنفس العنصر الناتجة عن اختلاف ترتيب الذرات.

اول مثال للمركبات دى بنستخدمه دائما خاصة فى ايام الامتحانات وهو الجرافيت ، يعنى لازم اختنا زبادى تاخد معاها جرافيت وهى رايحة الامتحان عشان تسطر ورقة الاجابة ويبقى شكلها كويس .

الجرافيت مركب يتكون من طبقات  من عنصر الكربون فى شكل حلقات سداسية ، هذه الطبقات سهلة الانزلاق فوق بعضها لذلك يسهل تكسيره.



المثال الثانى هو
 الماس



وهو موجود فى الصخور النارية ،ولونه شفاف ، وله تركيب بلورى يتكون من الكربون فى شكل تكعيبى منظم ومرتب بدرجة عاليه من الاحتراف لذلك فهو صلب جدا جدا......جدا



فاستخدموه فى قطع الزجاج وفى معدات الحفر ،مش بس فى المجوهرات.

ومن هنا اسألكم سؤالين .
س- خاتم ماس 2 جرام يعمل كام بالمصرى؟
س- فى كلمة واحد فقط لاغير قلى... ما الفرق بين الجرافيت والماس؟

مثال اخير من امثلة المركبات التى تتكون من الكربون فقط
 وده كنا بنستخدمه فى المعمل فى بعض التفاعلات ليمتص الشوائب على سطحه هو الفحم charcoal
ويتكون من احتراق الخشب فى الفراغ ، وطبعا فى الفراغ لانه اذا احرقنا الخشب فى الهواء سيتفاعل الكربون المتصاعد مع الاكسجين مكونا ثانى اكسيد الكربون ،وللفحم شكل مسحوق اسود صلب.

س - بالمناسبه ما الفرق بين الامتصاص والادمصاص؟

غير كده كمان عنصر الكربون موجود فى جسم الانسان .. فكل جزئ عضوى فى جسم الانسان  يدخل فى تركيبه عنصر الكربون ..

معلومه: الكيمياء العضوية هى العلم الذى يهتم بدراسه الكربون ومركباته.

وبهذا فاننا ناكل الكربون ونتنفسه وتتزين به النساء ونستخدمه فى الصناعة وغيرها من الاستخدامات.

اراكم مع عنصر اخر باذن الله ولكن بعد ان تجاوبوا الاسئلة 

السلام عليكم