من هذا المذيع ضيق الأفق هذا ؟!
كلامه به الكثير من المغالطات ..
عموما بداية الموضوع وهو الحديث عن الصينيين والصينيات والصناعة المصرية والاقتصاد المصري .. كله كلام سخيف ويبدو أن هذا المذيع متطرف في الاقتناع بنظرية المؤامرة .. صحيح الغزو الاقتصادي الصيني ليس شيئا ممتازا وله جوانب سلبية يجب الحذر منها ولكن الموضوع كله مسألة تعود للقوانين التي تضعها الدولة والتشريعات التي تنظم المسألة كلها .. ماليزيا التي نتحدث عنها دوما ونضرب بها الامثلة بدأت بانفتاح اقتصادي كبير جدا وحولت ماليزيا إلى بؤرة تجارية ضخمة ومع هذا لم تتأثر صناعتها المحلية زز بل على العكس هي لم يكن لديها تقريبا أي صناعة ومع هذا الانتفاح بدأت تتعلم من الآخرين وتنشأ صناعتها القادرة على المنافسة .. إذن لو كانت هناك مشكلة بسبب المنتجات الصينية فهي مشكلة المسئول الأول والأخير فيها هو المسئولين وأولي الأمر ..
لو الصين تهدف إلى تدمير مجتمعنا إذن ماذا يفعل الغرب ؟!
بالنسبة لموضوع الدخول " بأي شيء بايظ .. مغشوش .. ينفع .. ما ينفعش" .. يبدو أن المذيع المحترم نسي من هو المسئول عن هذا مرة أخرى .. أنا قابلت رجل صيني شخصيا كان يعمل كمراقب جودة .. وسألته عن جودة المنتجات الصينية الموجودة في مصر .. وأجاب أنها أسوأ أسوأ الدرجات وعلى الرغم من ذلك أسعارها مرتفعة ! طبعا بوضوح شديد المسئولين عن الاشياء البايظة واللي متنفعش هو المستوردين الذين يستوردوا أرخص الدرجات على الإطلاق ويبيعونها بنفس أسعار المنتجات الصينية الجيدة فيختلط الحابل بالنابل وتحدث المشاكل .. الصينيين في الأصل لا يأتون ليبيعوا منتجاتهم عندنا (موجود ولكن قليل جدا) ولكن نحن من نذهب إليهم ونستورد .. وكما هو مشهور عن الصين فإنها تنتج نفس السلعة بأسعار من جنيه إلى ألف .. وكل حسب مقدرته .. فلا لوم عليهم أنهم يصنعون أشياء بأسعار تقارب الصفر لكي تشتريها الطبقات الأدنى من المجتمعات حتى لو كانت جودتها رديئة فهي في النهاية أفضل من لا شيء .. وإنما اللوم على من يستورد هذه المنتجات ويبيعها بأعلى من أسعارها .. ولو أردتم أمثلة تفصيلية نستطيع أن نتحدث عن هذا لاحقا ..
أما بالنسبة لموضوع العروسة الصينية نفسه فلن أعترض عليه .. ولن أعترض على الكاتب في جريدة الأسبوع .. ولكن فق أطالبهما بدليل على صحة هذه الإشاعات .. فليأتوا بمصري تزوج من صينية بألف وخمسمائة جنيه .. أو يأتوا باسم أو عنوان الشركات أو الجهات المسئولة عن مثل هذا الزواج المزعوم .. أو فلنرى الإعلانات عن هذه الزيجات .. أو أي شيء ..
أصلا المانشيت من الأسبوع واصح جدا أنه مزحة سخيفة ..
"يا بلاش .. زواج بلا حماوات والتوصيل مجانا .. زوجة صينية بألف وخمسمائة جنيه .. وعليها واحدة هدية !!!!!!!!"
هل يستطيع أحد أن يعقل هذا ؟!
من وجهة نظري الشخصية أن لو وراء هذه الإشاعات أحد فهم شباب محبطون لا يستطيعون الزواج ولا يقدرون عليه فأشاعوا هذا حتى يصيبوا البنات وأهاليهم بالقلق ويشعروهم بالخطر فيبدأوا يشعروا بالواقع ويخلوا عندهم دم شوية ويخفضوا المهور ويزوجوا الشباب بدلا من تركهم لكل الفتن والمحن والمصائب .. ويبدو أن هذا أصاب الناس بالقلق فعلا وبدأوا يتسائلون كيف سيزوجوا بناتهم إذا كانت الزوجة الصينية بـ 1500 جنيه ..
والكلام الآخر المضحك عن أن الصينيات لا يدفعن ضرائب ولا يؤجروا شقق ولا يشتروا اي عقارات .. يمصون البلد ثم في النهاية يتركوا لنا فشل اقتصادي وصناعي .. وكمان جايين ياخذوا ولادنا علشان يربكوا المجتمع المصري رجالا ونساءً !!!!!!!!!!!!
هو إيه ده ؟! عايزين الصينين يدفعوا ضرائب على إيه بالضبط ؟ مش كفاية المصريين اللي مطلعين عينهم وبتمصوا دمهم ليل ونهار؟ شرقة ونهب ورشوة وفساد وتوزيع أراضي الدولة ببلاش على الحبايب وتصدير الغاز لاسرائيل وكل المصائب التانية في القائمة السوداء الطويلة جدا جدا جدا جدا جدا ؟! مالهم الصينين بالفشل المصري؟ هما كانوا ضربونا على إيدينا وخلونا نبطل نزرع قطن طويل التيلة ونزرع بداله أنواع سيئة أخرى ؟ ولا كان الصينيين هما اللي دخلوا المبيدات المسرطنة من إسرائيل ؟! ولا الصينيين كانوا بيعملوا سحابة سوداء فوق القاهرة وبسببها منعوا زراعة الأرز تقريبا ؟ ولا الصينيين هما اللي قفلوا شركة النصر للسيارات ؟ ولا بقية ال 4000 مصنع اللي اتقفلوا في آخر 30 سنة ؟ ولا هما اللي رفعوا اسعار الحديد وبقوا بيصدروه للخارج أرخص من اسعار بيعه في الداخل ؟
صينيين إيه اللي بيخربوا في البلد ؟! ده كلام ناس عاقلين ده ؟!
لأ وإيه كمان .. خطر على الأمن القومي .. أصل الصينيات اللي داخلين يتجوزوا الشباب اللي مش لاقي يأكل هيبقوا جواسيس !!!!!! يا سلام !!! هيتجسسوا على الشاب المصري أبو مرتب 200 جنيه في الشهر علشان يعرفوا مثلا المعجزة اللي بتخليه لسه عايش بالمرتب ده ؟ ولا هيتجسسوا عليه علشان يعرفوا إزاي هو بيأكل كل الأكل المسرطن والمسموم واللي فيه مصائب الدنيا وبيقدر يقاوم ويفضل عايش؟؟ يتجسسوا على إيه بس يا عم المذيع الناصح أنت يا اللي خايف على الأمن القومي .. إذا كان الاسرائيليين بياخدوا المعلومات اللي هما عايزينها علني ورسمي ومن المنظمات الحكومية وبأمر مباشر من سيادة الوزير ! ده طبعا غير إن أكبر رأس في البلد حبيب نتنياهو وقاعدين مع بعض على طول في شرم الشيخ .. طيب كنت قول هيتجسسوا لإيران مثلا .. أو أقولك .. قول إنهم هيطلعوا في النهاية من حماس وبضربوا رصاص بيلف ويرجع تاني علشام بيقتل الجندي أحمد شعبان .. أيوه أيوه .. هما الصينيين الأوغاد كلهم حماس وبيهددوا الأمن القومي لإسرائيل ولازم نقطع رجل الصيني اللي هيعدي الحدود ..
ده إيه الخبل ده ؟!
صحيح أنا معارض حكاية الزوجة الصينية تماما لو صحت أي من هذه الإشاعات ولكن هذا لا يعني كل هذا السخف وضحالة التفكير والاستخفاف بعقول الناس ! ضحكتوا العالم على مصر والمصريين .. ربنا يهديكم ..
