حكايات من بلدى

[غريب الدار]

 

يظل الشعب المصرى دائماً و أبداً الشعب الوحيد الذى يسخر من مشاكله و يعشق النكتة وسط الأزمات

جايز تكون سلبية ؟؟

جايز

جايز تكون طبيعة ؟

جايز

و يمكن بدون تعصب هو  شعب يتميز بحلاوة اللسان و خفة الدم عن غيره من الشعوب

و يمكن كمان يتميز ببعض العادات الغريبة يعرفها جيداً أى مصرى

منها

بيفهم في الطب ويشخص المرض ويوصفلك الدوا وبيفهم في النقاشة والكهربا وتصليح العربيات والطبيخ والسياسة والكورة وهو أبيض ياورد

بيحط الريموت كونترول في كيس بلاستيك كعادة فرعونية

يقف يتكلم على الباب نص ساعة بعد إنتهاء الزيارة والسلام

لمّا تفتح نملية المطبخ هتلاقي عنده عشرين برطمان بتاع مربى فاضي بقالهم سنين ومازال مُصِر على جمع المزيد

ييجي بعد معاده بساعتين ويفتكر إن ده عادي

لسه عنده إصرار إنه يتكلم بصوت عالي في التليفون لما تكون المكالمة دولية عشان التاني يسمعه

بيعتبر نفسه أفضل واحد في الشرا والفصال وبعد كده يكتشف إن الحاجة في المحل اللي جنبه أرخص من غير فصال

بيحتفظ بأكياس محلات اللبس والأحذية وورق الهدايا تحت مرتبة السرير لسنوات

بيشيل طابع البريد من على الظرف لو الختم ماكانش عليه لإعادة استخدامه

بيفتكر إن أي حد بيشتغل في الخليج بيغرف فلوس من غير حساب

بيفرش ملاية سرير على طقم الأنتريه عشان يفضل نضيف لما ييجي ضيوف ومابيشيلهاش لما ييجوا

شوية حاجات كدة لازم تميز من يكتب فى بطاقته مصرى ( مش قبلية ولا جاهلية يعنى لأحسن حد يفهمنى غلط )

أنا ايه اللى وصلنى لهنا

اه

الموضوع عبارة عن سلسلة قصصية كوميدية ساخرة هادفة  ( أو مش هادفة قوى يعنى )

عموماً

ممكن نخرج منها بكلام مفيد

أو نرى فيها أنفسنا للأسف

بس يمكن أحياناً كشف عيوب مثل السلبية , التفاخر , اهدار قيمة الوقت فى قصة تظهر أكثر منها حياتنا الفعلية

و فى الآخر

" أضحكم الله فى الدنيا تتحدون الصعاب

و فى الآخرة فى نعيم الجنة حيث لا هموم

و ساعتها هنضحك بجد من قلبنا "

[ماما هادية]

و يمكن بدون تعصب هو  شعب يتميز بحلاوة اللسان و خفة الدم عن غيره من الشعوب

   

فعلا ومن غير نقاش

متابعين باهتمام

 

[ماما فرح]

 

غريبة يا أخي    أنت بتوصف المصريين كأنك مصري 

 

متابعون ضاحكين من الآن

[ريحان المسك]

مممم فكرة حلوة

بس في حاجات كتير قلتها بيعملوها شعوب تانية

زي الكيس البلاستيك بتاع الريموت مثلا , و ورق الهدايا و الأكياس , و الطوابع , و كمان الصوت العالي في اوقات المكالمات الدولية

عموما الموضوع من عنوانو باين هيصحي المنتدى مزبوووووط , هنبقى محتاجين ضحك شويتين بعد الإمتحانات و الله

بالإنتـــــــــــــظار

[غريب الدار]

أول قصة طلعت مش قصة

 

حسبة لقيتها على النت للحياة فى مصر و تكلفة المعيشة  بس قديمة شوية فكرت أعيد صياغة الموضوع فى الوقت الحالى و قد كان و ذهلت من النتائج  ,  أنا تيقنت إن مصر تسير ببركة الله و بركة الأولياء إن جاز التعبير

حقيقى عمرى ما قعدت حسبتها

على فكرة متوسط الدخل للعمال و الموظفين و صغار الحرفيين و العاملين بالأجرة فى البناء و المصانع و غيرها من الأشغال الأساسية فى مصر

ينحصر من 300 ج إلى 1000

عموماً أنا كشاب فاضلى سنتين و اتخرج إن شاء الله  أملى فى شركة متوسطة لا يزيد عن 700 ج

و ممكن نقول متوسط الأسرة فى مصر 5  أفراد  و لا بلاش خلينا فى تحديد النسل - اللى هتعرفوا بينادوا به ليه بعد شوية - يبقى كفاية عيلين

يبقى الحسبة على أسرة من 4 أفراد

لو شاطر ... تعرف تعيش فى مصر بـ 1000 جنيه ! ! !

عيش بلدي 1 ج يوميا 30 ج شهريا
بس لازم تلحق دورك فى طابور الفرن وتلحق شغلك فى نفس الوقت ربنا معاك

حليب نصف كيلو يومياً ب 2 ج  يبقى 60 ج شهرياً

فول كيلو أسبوعياً ب8 ج  يبقى 32 ج شهرياً

جبنة بيضاء كيلو أسبوعياً ب 20 ج يبقى 80 ج شهرياً

بيض كفاية كل واحد نص واحدة يومياً  ( دة حتى فى فول و جبنة هننهب ) يبقى 30 ج شهرياً
لا حظ ثمن البيضة أصبح نصف جنيه

خضار6 ج يومياً يبقى 180 ج شهرياً
عبارة عن صنف واحد بس + كيلو طماطم + لمونه وحزمة جرجير اسبوعيا


فواكه 2ك أسبوعياً لن تقل عن 8 ج يبقى 32ج شهرياً

سكر و زيت و أرز و شاى ( دول بقى ملناش حجة الحكومة مدعماهم و بيبقوا ب 45 ج لأربع أفراد )

مكرونة كيلو بحالو أسبوعياً للأسرة الكريمة يبقى 20 ج شهرياً

دجاج  واحدة أسبوعياً ب25 يبقى 100 شهرياً
عدد واحد دجاجة اسبوعيا للعائله اظن معقول

سمك كيلو واحد أسبوعياً ب10ج يبقى 40 شهرياً

لحم مرة شهرياً لو طولتها ( و البركة فى اللحوم المجمدة اللى مش عارفين مصدرها ) 50 ج
ملحوظة يمكن الحصول عليها فى الأعياد

بقوليات 1ك أسبوعياً يبقى 20 شهرياً

توابل 20 شهرياً
عبارة عن دقيق + ملح + كمون + فلفل + كسبرة

صابون 15 شهريا
عبارة عن صابونه واحدة للحمام + صابون مواعين + مسحوق للملابس ( النظافة عموما )


مواصلات ودى لواحدها كارثة بالنسبة بالنسبة لأسرتنا مثلاً لا تقل بحال من الأحوال عن 200 ج شهرياً دة لو كنت من مقاطعى التاكسى أو من الموفرين بشكل عام

حلاقة و شامبو و نظافة شخصية لا تقل عن 40 ج شهرياً
عبارة عن حلاقة الشعر + ماكينات حلاقة الذقن

مصروف العيلين لو كل عيل هياخذ جنيه يومياً يبقى 60 ج
عبارة عن مصروفات المدرسة + مصروف العيال اليومى + كراسات واقلام وجلاد

دكتور 30 شهريا
نمرض بالدور طبعا عدد اربع افراد مرة واحدة للفرد كل 4 اشهر وربنا يستر


ادوية 30شهريا
أكيد طبعا العلاج بالدور وربنا يستر واتنين ميمرضوش فى وقت واحد تبقى كارثه


تليفون20 شهرياً
اشتراك الهيئة هنرد بس ومش هنتكلم معدش ينفع كلام
دة غير الموبايلات

مياة 10 شهريا
للأسف لازم تركب فلتر مع مياه من هذا النوع

غاز 20 شهرياً هيتخفضوا إلى 5 ج بعد تركيب الغاز الطبيعى

نور 25 شهريا
لمواكبة التطور غساله ملهاش مسحوق - تلاجة فاضية - بوتجاز يستخدم مرة كل اسبوع

ملابس 100 شهريا
عبارة عن الصيفى والشتوى واحذية وشرابات و كل ما تريده يعنى لو حسبناهم فى السنة 1200 يجيبوا 4 بنطلونات ب 300 ج  + 4 ترنجات 300  + 4 تشرتات 200ج  + 4 أحذية 300 ( من أردأ الأنواع مش هتكمل 3 شهور )  + 100 ج البقية الباقية يبقى كدة الفلوس خلصت

يصبح الإجمالى 1289 ج

تقدر تخليهم 1000

اكيد اللى هيخليك تعرف تعمل الكلام اللى فوق ده هيخليك تتصرف وتضغط مصروفاتك شويه علشان تبقى الحسبة 1000 جنية اقولك متمرضش ومتخدش ادوية وشيل 80 جنية معلش ربنا يقويك وينصرك على من يعاديك ويكفيك شر المرض .



عيد الام
ربنا يخليها ويديها الصحه
كل سنة وهى طيبة
( 0 )


عيد الكحك
مضر وملهوش لزمة
كل سنة وانتم طيبين
( 0 )

حلاوة المولد
السكر مضر وملهوش لزمة
كل سنة وانتم طيبين
( 0 )

أخ خ نسيت احسب زكاة الفطر بس مش عارف هتدفع ولا هتأخد ؟ ( على فكرة فى مصر يصدق مثال " دول ياكلوا مال النبى " فأموال الزكاة فى مصر تسرق حقيقة لا مبالغة و كشف هذا الموضوع فى أحد السنوات )

عموما نقول على قائمة الممنوعات والمحظورات متقربوش منها علشان تعرفو تكملو الشهر.

ممنوع عنك الحلاوة والمربى والعسل والزبدة وكافة انواع الجبن عدا ماذكر فى التعيين (الجبنه البيضا) فقط .


المعلبات تونه بلوبيف لانشون سالمون  وطبعا البسطرمة والزيتون والمخللات ممنوووع .

اوعى قلبك يحن لعيل من العيال وتجيبله شيبسى ولا ببسى أو كراتيه أونايتى أو عسلية أو بسكوت أو شيكولاته اياك ومنتجات العيال الصغيرين حتى لو حليب بالفواكهه او لبانه وجيلى كولا وهوهوز حتى الشيتوس يتفرج على الكرتون بتاعه فى التليفزيون ومتخليهوش يتفرج على الاعلانات بين الفاصل كمان وربنا معاك .

احظر اللحوم بانواعها البفتيك والاستيك والرقبة والموزة واللوزة كله كلام فاضى خليك فى تعيينك الاسبوعى .

خليك واقعى وانسى المحمر والمشمر واللب والسودانى والتسالى بانوعها والمحمصات والمقرمشات والمكسرات بانواعها بالعربى انت زى العصفورة تاكل عيش ودنيبة رز وتشرب ميه عمرك سمعت عن عصفورة ركبت دش أو وصلت نت او حتى فكرت تاكل ترمس او تشرب حمص كله كلام فاضى ممنوع فاهم يعنى ايه ممنوع .

اهم حاجة مترحش لدكتور متجبش مدرس ولا ادوية واياك من المعجنات زى البيتزا والفطائر ومش محتاج افكرك ان البسبوسه والجلاش والكنافة والقطايف والجاتوة والشاتوة والتورت وام على وصوابع زينب ورموش الست والكحك والغريبة ممكن تستغنى عنهم .


وطبعا معجون الاسنان والحلاقة والشامبو والبلسم كلها رفهيات ملكش فيها زى البصل والتوم والبطاطس كلها اساسيات ملكش فيها برضه ومتنساش تبلغ الناس اللى تعرفهم هما اكيد زيك محتاجين شوية نظام مش اكتر هما غلابة وفكرهم يقولو لعيالهم لو شافو مسلسل فى التليفزيون مليان بهرجه ان دى قصص خياليه كانت فى العصور القديمة فترة من الزمن و ان الواقع زى ماهما شايفيين حتى الاعلانات حاولو تفهموهم انها مجرد الوان مبهرة وتكنولوجيا فى علم التصوير وتخيلات ممكن تحصل بعدين زى ماحصل فى امريكا وكندا وفرنسا والمانيا واوربا كلها وان الحجات دى علشان لما الناس دى يجو عندنا يلاقو منها ويعرفو يعيشو هى مش لينا دى ليهم هما اصحاب البلد ولازم ينبسطوا .


عموما لو على الكلام مش هيخلص روح الحق طابوور العيش تبقى مصيبة لو الفرن شطب .



تفتكروا 1000 جنية ... تكفى ؟  


طب أيه رأيك فى الى بياخد 200 جنيه !!

حقيقى و الهى موجودة  مع جميع المدرسين فى بداية تعيينهم شوفوا المدرسين يشكلوا كام مواطن


تتوقع أنسان زى ده يقدر يعيش أزاى !!

فى النهاية مع تحفظات على المغنى مدحت صالح و الأغانى بشكل عام و على استحياء له أغنية تحسب له و هى " لا باظت ولا خربت "

اسمعوها

http://www.youtube.com/watch?v=VuuZWnFBhtE

و دة فيديو حلو برضه يمثل مهزلة مصرية أخرى

http://www.youtube.com/watch?v=cDN0PZB_m24&feature=related

ملحوظة : تعاطفك لوحده مش كفاية



 

بجد والهى !!!!!!!

[ماما هادية]

لا حول ولا قوة إلا بالله العلي العظيم

لكن يا غريب الدار هل لديك إحصاء عن عدد المصريين الذين حطموا حاجز المليــــــــــــــــــــــــــــــار؟؟؟

هات الإحصاء، واحسب نسبتهم بالنسبة للشعب
واحسب لنا لو أدى هؤلاء زكاة اموالهم فقط... كيف يكون الوضع

[ريحان المسك]

 

عجبتني الصورة الأخيرة

ملهمة علشان الشباب يهاجروا لبلاد تانية

يحيا التشجيع الوطني

و الضحية طلعت الألف جنيه 

[زينب الباحثة]

موضوع ظريف

مع انه يحكي حال العديد من الدول العربية

ليست مصر الوحيدة